المعمورة

اتاخرنا عليكوا كتير بس كل ده كنا بنجهز كذا موضوع عشان نتكلم فيه تعالوا بقى لموضوع النهارده
مينفعش تبقى فى أسكندرية ومتخصصش يوم للمعمورة
لأنها مصيف الاسرة او العائلة الكاملة
احنا النهارده حبينا نتكلم على موضوع جديد يخص المصيف

كل الناس دلوقتى بتفكر لما تصيف مصيف (نضيف وهادى) اول حاجه بتيجى فى بالها هو الساحل وبيبعدوا عن تفكيرهم إسكندريه لأنها زحمه ودى حقيقه فعلاً
لكن فى مكان فى الإسكندريه يعتبر جنه بالنسبه للشواطئ بتاعته او الهدوء اللى بيتميز بيه (عن المعموره اتحدث)
تجربتى مع المعموره هو انى اجرت شاليه هناك ٥ ايام (بتختلف اسعار الشاليهات على حسب تشطيب الشاليه )بتبدى ب١٢٠٠ وبتوصل ل٢٠٠٠ فى اليوم وبيبقى شاليه محترم بيكفى اسره كبيره
وبالنسبه لدخول الشاطئ فهو بيبقى مجاناً طالما معاك الكارت اللى اجرت بيه الشاليه او الشقه ..معموره تعتبر زى لسان داخل لجوه على البحر
وفى هناك برضو شواطئ مميزه بيبقى رسم الدخول بتاعها غالى اوى بيوصل ل 100 جنيه للفرد ومش بيدققوا فى عدد الاطفال يعنى بيحسبلك طفلين او تلاته فى تذكره واحده ، فى برضو هناك مكان مميز جداً على الشاطئ تقدر تأجر منه jet ski ب ٢٥٠ جنيه للربع ساعه وعنده برضو banana boat ب٦٠ جنيه للفرد وبيطلع معاك ناس محترفه ومعاهم كاميرا بروفيشينال يصوروك احلى صور انت وفى البحر ويسلام لو يبقى فى الخلفيه قصر المنتزه
اما بالنسبه للخروجات باليل فبيبقى فى ممشى جميل على البحر وتقدر كمان تأجر من عليه عجل و بيتش باجى و سكوتر كهربا وحاجات كتير بتبقى ممتعه جداً وممكن برضو تدخل المنتزه(اللى هو احسن مكان فى إسكندريه )وتتفسح هناك على طول من المعموره
وفى برضو كافيهات ومطاعم كتير على البحر فى الممشى واسعارها كويسه، وملاهى كبيره جداً متقلش حاجه عن دريم بارك
وفى برضو فى المعموره شارع كبير اسمه السوق فى كل حاجه حرفياً (فول اسكندرانى - طعميه - محلات ملابس - چيلاتى - محلات سمك - إلخ ) وصيدليات شغاله ٢٤ ساعه
رسم دخول المعموره 20 جنيه للفرد او العربيه لو أنت مش معاك كارنيه التأجير، واوبر وكريم والتاكسى بيدخل لحد جوه من غير رسوم
المعموره بتبعد ٣٠ دقيقه عن محطه سيدى جابر اللى هى تعتبر قلب اسكندريه
وممكن فى اى لحظه تطلع من المعموره تروح اسكندريه تتفسح شويه او تجيب حاجه من هناك وتيجى فى اسرع وقت مش مسافه يعنى انا عن نفسى كنت بنزل اسكندريه كتير اروح ميامى اكل من چيلاتى لبنان او اشترى حاجات من شارع خالد بن الوليد او اروح مول سان ستيڤانو اللى هو ميقلش حاجه عن المولات اللى فى القاهر بل انضف واحسن بكتير او اتمشى على كوبرى ستانلى
ونصيحه منى متتعاملش مع التاكسى كتير افضل حاجه هناك اوبر وكريم
عن تجربه ونصيحه منى
بجد هتحس بالمصيف هناك فى المعموره بعيداً عن الساحل وعزله الساحل
اللى انا بشوفه عباره عن كافيهات باليل وبس