الناس اللى عايزه تقضى يوم واحد ف ااسكندريه عايزها تركز اوى معايا.
-الانتقالاتعندك نوعين من القطارات:
*قطار الساعه 8:10 صباحا من القاهره درجه تانيه مراكز ب 30 جنيه مكيف و بيوصل علي 11:15.
*قطار الساعه 9 صباحا مباشر من القاهره درجه تانيه ب 45 جنيه بيوصل 11:45
-البرنامج
تنزل محطه سيدي جابر تتحرك اتجاه الترام و تعدي شريط اول ترام و تركب اتجاه الي رايح شمال محطه الرمل و ده اخر الخط بياخده في 25 دقيقه و سعر التذكره 1 جنيه.
-الفطار
الاكل الاذواق و الكل هيختلف في الاختيار مع اي محل بس خليني اكتب البرنامج بطريقتي.
هتروح محمد احمد و ده اسال اي اسكندراني هيقولك فين هتتمشي 5 دقائق من الترام
اطلب جبنه دمياطي مقليه و بنجر و طعميه و بابا غنوج متوسط سعر 20 جنيه
هتخلص هتروح البن البرازيلي و خد بالك بيقفل ساعه الصلاه لو يوم جمعه و اطلب من عنده موكا ساقعه او كارمل ب 25 جنيه سعر الكارمل.
هتنزل علي البحر و هتتحرك اتجاه بحري
عندك حل من الاتنين:
*تتمشي لحد المرسي ابو العباس عند منطقه المراكب و تقريبا هتتمشي 25 دقيقه.
*تركب كاريته و ده الراجل هيبدا معاك ب 50 جنيه المشوار لحد القلعه بس انت فاصل و خدها منه ب 25 او 30 جنيه المشوار و الكاريته بتشيل 5 افراد فبالتالي المبلغ لو اتقسم علي 5 يبقي كل واحد هيدفع 5 جنيه
هتنزل عند الجامع الي جنب القلعه هتلاقي بين الجامع و القلعه ميناء و هتلاقي ناس بتعرض عليك تركب مركب رحله بحريه
هيقولك سعر 150 جنيه لمده 45 دقيقه فاصل معاه و خدها علي 110 و لو الدنيا هاديه مش زحمه خدها علي 100 جنيه و خد بالك ده سعر المركب مش الفرد و المركب بتشيل من 8 الي 10 افراد.
هتستمتع جدا بالرحله ديه و نصيحه و انت راجع بالمركب علي الميناء قول لراجل عايز تعمل اللفه تاني يعني تاخد اجمالي عدد ساعات ساعه و نص و طبعا لو انت معاك عدد المبلغ هيتقسم و يكون 22 جنيه تقريبا رحله بحريه مع استجمام.
-الغدا
عندك تلات اختيارات و ده متوقف علي الفلوس الي معاك و هاكد معلومه تاني الاكل اذواق فكل واحد ليه ذوقه في المحلات و الاكل.
اولا عروس البحر
لو عامل حسابك في سمك يبقي تتمشي من القلعه لمسجد المرسي ابو العباس و 5 دقائق و هتلاقي نفسك دقيقه تمشيه لعروس البحر.
اطلب من عنده شوربه جمبري احمر ببلاش و طاجن عروس البحر صوص ابيض هيعحبك جدا بس هنتكلم علي الاقل في 150 جنيه بالسلطات و الخدمه
ثانيا كبده فرج ابو خالد
قصاد عروس البحر تضرب سندوتشات كبده و مخ محترمه و رخيصه و طعمه حلو جدا بالنسبالي احسن من كبده الفلاح و ديه اذواق.
ثالثا حواوشي محمد حامد
هتتمشي لمنشيه عند قهوه فاروق هتتمشي من القلعه حوالي 15 دقيقه و هتلاقي جزار اسمه محمد حامد بيعمل احلي حواوشي اسكندراني و خد بالك الحجم كبير جدا و خدها باللحمه و السدق و وش بيتزا و هيكون متوسط سعر 50 جنيه خد الاكل و اقعد علي مراكب بحري و استمتع بالبحر.
-الحلو الاسكندراني عندك حاجتين:
-ابو سيف
وده جنب محمد حامد علطول
خد من عنده رز باللبن و المكسرات و القشده و العسل و ده سعره ب 18 جنيه و احلي حاجه ان المكسرات مش متخزنه.
-الشيخ وفيق
و ده هتتمشي ليه حوالي 30 دقيقه لو عند المنشيه و 15 دقيقه من القلعه.
و روح اطلب رز بلبن او كسكسي مكسرات ب 17 جنيه.
هتخلص يا دوباك تركب مشروع "مايكروباص" ب 3 جنيه و قوله عايز تنزل سيدي جابر تلحق قطار 8:20 عوده لقاهره درجه تانيه ب 30 جنيه و درجه اولي ب 51 جنيه.
قطار تحس متهالك بس الحمدلله شغال بقاله سنين و عمل فوق ال 2000 رحله و ده بيوصل علي 11:30 مساءا محافظات.
*ملحوظه
اعمل حسابك من عند الشيخ وفيق في 45دقيقه تتحرك من المكان الي اقرب مكان لمحطه سيدي جابر عشان هتتمشي 10 دقائق من مكان نزولك لمحطه.
اتمني اكون عملت برنامج بسيط مش مكلف و مش محتاج تركب مواصلات فيه عشان كله جزء شمالي عند بحري.
